2020 жылдың мамыр айында Қазақстанда пилоттық режимде «AULAFIT» (Аулафит) әлеуметтік жобасы іске қосылды. Жобаның мақсаты – ауыл, аудан және қала тұрғындарына өз аулаларында (немесе жақын скверлерде) спортпен тегін және қолжетімді түрде айналысу мүмкіндігін беру.
Жоба авторы – Олимпиада чемпионы Серік Сәпиев, ал жобаны іске асыруға қаржылай қолдау көрсеткен – қазақстандық QNP компаниясы.

Тәжірибелі жаттықтырушылардың жетекшілігімен және спорттық құрал-жабдықтарды пайдалана отырып, таза ауада спортпен шұғылдану – аула ішінде немесе жақын маңдағы скверде – ұлт денсаулығын нығайтуға септігін тигізеді. Жобаға 3 жастан 70 жасқа дейінгі тұрғындар қатыса алады.

Қазақстан Республикасының Президенті Қасым-Жомарт Кемелұлы AULAFIT жобасына қолдау көрсетті. Жоба осы уақытқа дейін еліміздің көптеген аймақтарында сәтті жүзеге асырылды.

2023 жылдың жазында Астана қаласы әкімдігінің, Мәдениет және спорт басқармасының және спорттық-бұқаралық іс-шаралар дирекциясының қолдауымен жоба Астананың 5 ауданында, 10 аулада жүзеге асты.